Россия ҳарбийлари Хитойда махфий тайёргарликдан ўтди — «Reuters»

Россия ҳарбийлари 2025 йилнинг иккинчи ярмида Хитойда оммавий қирғин қуроллари қўлланиши шароитида ҳаракат қилиш бўйича махфий тайёргарликдан ўтган. Бу ҳақда «Reuters» агентлиги Европа расмийлари ва Россия Мудофаа вазирлигининг ички ҳужжатларига таяниб хабар қилди.

Маълумотларга кўра, махфий дастур Россия мудофаа вазири Андрей Белоусов томонидан шахсан маъқулланган. Тайёргарлик жараёнида камида тўрт нафар Россия ва Хитой генерали иштирок этган.

Курслардан бири уч ҳафта давом этган ва ядровий, кимёвий ҳамда биологик таҳдидлардан ҳимояланишга бағишланган.

Нашрнинг ёзишича, Россия ҳарбийларига кимёвий ва радиация разведкаси, шунингдек, вентиляция тизимларини зарарланишдан муҳофаза қилиш усуллари ўргатилган.

Машғулотлар ноябр ойида Пекиндаги ҳарбий объектда ўтказилган. Ҳужжатларда хитойлик инструкторлар раҳбарлигидаги машғулотлар акс этган фотосуратлар ҳам мавжуд.

Ҳужжатлардаги тафсилотлар

«Reuters» келтирган ҳужжатларга мувофиқ, тайёргарликни ташкил этиш бўйича келишув Россия генерал-майори Рустам Хусаинов ҳамда Хитой Халқ озодлик армиясининг катта полковниги Сун Даюн томонидан имзоланган.

Россия делегациясига Қуруқлик қўшинлари бош қўмондони ўринбосари генерал-полковник Рустам Мурадов раҳбарлик қилган.

Ҳужжатларда хитойлик мутахассислар Россия ҳарбийларига ядровий реактор модели орқали амалий тушунтириш бергани ҳам қайд этилган.

Европа расмийлари фикрича, машғулотларда юқори лавозимли генераллар иштирок этгани ҳамда оммавий қирғин қуроллари билан боғлиқ мавзуларнинг дастурга киритилиши Москва ва Пекин ўртасидаги ҳарбий ҳамкорлик стратегик тус олаётганидан дарак бериши мумкин.

Пекиннинг муносабати

Хитой Ташқи ишлар вазирлиги агентликка берган муносабатида ушбу маълумотларни «бутунлай асоссиз» деб атади.

Вазирлик мамлакатнинг Украинадаги уруш бўйича расмий позицияси ўзгармаганини таъкидлаган.

Расмий Пекин ўзини бетараф томон сифатида кўриши, можарони тинч йўл билан ҳал этиш тарафдори эканини билдиради.