Россияда ишёқмаслик учун жазо жорий қилиш таклифи билдирилди
Давлат кенгашига йўлланган таклифда ишламайдиган фуқароларни қамоққа олиш ёки мажбурий меҳнатга жалб қилиш кўзда тутилган.
Россия Федерал хавфсизлик ва коррупцияга қарши кураш лойиҳаси раҳбари Виталий Бородин ишёқмаслик (яъни жамиятга фойда келтирувчи меҳнатдан бош тортганлик) учун жиноий жавобгарлик жорий этиш таклифини берди. Унинг таклифи Федерация Кенгаши раисини Валентина Матвиенкого йўлланган мурожаатда баён этилган.
Ҳужжатга кўра, иш билан таъминлаш хизмати томонидан иш таклиф қилинган, лекин ҳеч қандай асосий сабабсиз ишламасликка қарор қилган фуқароларга 1 йилгача озодликдан маҳрум этиш жазоси белгиланиши мумкин. Шунингдек, 360 соатгача мажбурий жамоат ишлари, икки йилгача ахлоқ тузатиш ишлари ёки бир йилгача мажбурий меҳнат туридаги жазолар ҳам кўзда тутилмоқда.
Бородин ўз таклифини кадрлар танқислиги, ноқонуний миграция билан боғлиқ жиноятчиликнинг ўсиши ва демографик муаммолар билан изоҳлаган.
Россияда 1991 йилдан буён ишёқмаслик жиноят сифатида тан олинмайди. Бу соҳани фақат «Аҳолини иш билан таъминлаш тўғрисида»ги қонун тартибга солади. Унда ишсизликка йўл қўйилиши ва ишсизларга нафақа тўланиши назарда тутилган.
Бундай ташаббуслар Россияда илгари ҳам муҳокама қилинган. Масалан, 2016 йилда махсус солиқ жорий этиш таклиф қилинган ва 2023 йилда ишсиз юрганларни Украинадаги урушга юбориш ҳақидаги чақириқлар ҳам бўлган. Жорий йил кузида Валентина Матвиенко ишламайдиганлар учун 45 минг рубллик мажбурий тиббий суғурта бадали жорий этишни таклиф этган. Бу сумма ишсизлар учун белгиланган уч ойлик энг юқори нафақага тенг.
Давомидан, Давлат Думаси молиявий бозор қўмитаси раиси Анатолий Аксаков ишсизларни «ишёқмаслар» деб атаб, улар пенсия ва тиббий суғурта жамғармаларига тўлов қилишлари шартлигини билдирган.
