SpaceX ракетасининг бир қисми Ойга урилди
Ишдан чиққан SpaceX ракетасининг юқори поғонаси белгиланган траекториядан четга чиқиб, Ойга урилди. Тўқнашув Ер учун хавф туғдирмади, аммо космик чиқиндилар муаммосига яна бир бор эътиборни қаратди.
SpaceX компаниясига тегишли Falcon 9 элтувчи ракетасининг юқори поғонаси, кутилганидек, Ойга урилди. 5 август, чоршанба куни содир бўлган тўқнашув фактини Чилидаги Европа жанубий обсерваторияси (ESO) тасдиқлади. Улар Very Large Telescope (VLT) телескопи ёрдамида тегишли спектрал чизиқларни аниқлаш орқали буни қайд этишган.
Аввалроқ АҚШ Миллий аэронавтика ва фазони ўрганиш бошқармаси (NASA) зарба жойини суратга олиш ниятида эканини маълум қилган эди. Бироқ суратларни Ерга узатиш бир неча кун вақт олиши мумкин.
NASA тахминларига кўра, ракета бўлагининг Ой сатҳи билан тўқнашуви натижасида диаметри тахминан 18 метр ва чуқурлиги қарийб 4 метр бўлган кратер ҳосил бўлади. Зарба Эйнштейн ва Белл кратерлари яқинида юз бериши кутилган эди.
Ишдан чиққан ракета бўлаги траекториядан четга чиққан
2025 йилнинг 15 январида SpaceX компанияси Falcon 9 ракетасини коинотга учириб, Ойга мўлжалланган «Blue Ghost 1» қўниш модулини муваффақиятли олиб чиққан эди. Ракетанинг биринчи поғонаси Ерга қайтган, бироқ юқори поғонаси коинотда қолиб кетган.
«Қуёш фаоллиги ва гравитацион таъсирнинг уйғунлиги» сабабли у белгиланган траекториядан четга чиқиб, бехосдан Ой томон йўналди», - дея маълум қилган эди тўқнашувдан олдин SpaceX’нинг NASA илмий дастурлари ва Dragon дастурлари бўйича директори Жулианна Шайман.
Гарчи бу тўқнашув Ер сайёраси учун ҳеч қандай хавф туғдирмаса-да, у коинотдаги чиқиндилар муаммосига яна бир бор эътиборни қаратди. Европа космик агентлиги (ESA) ҳисоб-китобларига кўра, ҳозирги вақтда Ер орбитасида умумий вазни қарийб 17 минг тонна бўлган 46 мингдан ортиқ космик чиқинди объектлари айланиб юрибди.
