Украинага $800 млн: Трамп АҚШнинг 2026 йилги мудофаа бюджетини имзолади

АҚШ президенти Доналд Трамп 18 декабр куни 2026 молиявий йил учун миллий мудофаани таъминлаш тўғрисидаги қонунни имзолади. Оқ уй сайтида эълон қилинган маълумотга кўра, ҳужжат шу кундан кучга кирган.

S.1071 рақамли ушбу қонун АҚШ тарихидаги энг йирик ҳарбий бюджетлардан бирини белгилайди. Ҳужжатга мувофиқ, 2026 йилда мудофаа соҳаси учун жами 901 млрд доллар ажратилади. Бу маблағлар Қуролли кучлар, ҳарбий қурилиш, шунингдек, Миллий хавфсизлик соҳасидаги дастурларни молиялаштиришга йўналтирилади.

Қонун доирасида Пентагон фаолияти, ҳарбий инфратузилма, ядро хавфсизлиги ҳамда энергетика ва ташқи ишлар идоралари орқали амалга ошириладиган миллий хавфсизлик дастурлари қамраб олинган. Шу билан бирга, ҳарбий хизматчиларнинг ижтимоий таъминотини яхшилашга қаратилган чора-тадбирлар ҳам назарда тутилган.

Ҳужжатда халқаро хавфсизлик, савдо сиёсати ва суд тизими билан боғлиқ айрим соҳаларда қўшимча ваколатлар жорий этилиши белгиланган. Бу ўзгаришлар АҚШнинг глобал хавфсизликдаги ролини мустаҳкамлашга қаратилгани таъкидланмоқда.

Украинага нисбатан эса қонунда алоҳида модда мавжуд. Хусусан, Украинага ҳарбий ёрдам кўрсатиш учун жами 800 млн доллар ажратилади. Бу маблағлар 2026 ва 2027 йилларда тенг тақсимланиб, ҳар бири 400 млн доллардан Инициатива ёрдами доирасида сарфланади. Ушбу дастур АҚШда ишлаб чиқарилган қурол-яроғни Украина Қуролли кучлари учун харид қилишни назарда тутади.

Қонуннинг қабул қилиниши Трамп маъмурияти Россия–Украина уруши бўйича музокараларни олиб бораётган бир пайтда амалга оширилди. Бу ҳолат Вашингтоннинг бир вақтнинг ўзида ҳам дипломатик, ҳам ҳарбий йўналишда фаолият юритишга уринаётганини кўрсатади.