Владимир Путин ҳокимиятга 24 қариндошини жойлаштиргани фош этилди

«Проект» журналистик таҳлилий маркази олиб борган суриштирувга кўра, Россия президенти Владимир Путин ҳокимият тизимида шахсий кумовчилик ва қариндош-уруғчиликни энг юқори даражага олиб чиққан. Хабарда айтилишича, у 24 нафар қариндошини давлат лавозимларига жойлаштирган — бу Россиянинг сўнгги 100 йилдаги энг юқори кўрсаткичи.

Суриштирув «Оталар ва боболар» деб номланиб, Telegram’даги «Агентство» канали томонидан 6 ноябр куни эълон қилинди. Унда айтилишича, Путиннинг расман ва норасман тан олинган турмуш ўртоқлари — Людмила Очеретная, Алина Кабаева, Светлана Кривоногих ва Алиса Пишчевая — ҳам давлат маблағлари билан боғлиқ соҳаларда ишлайди ёки пул олади. Масалан, Очеретная ҳеч қаерда ишламаса-да, ҳар йили юз миллионлаб рубл даромад олади.

Путиннинг икки қизи — Мария Воронцова ва Екатерина Тихонова — ҳам давлат маблағлари билан боғлиқ лойиҳаларда иштирок этмоқда. Уларга яқин бўлган турмуш ўртоқлари — амалдагилар ва собиқлари ҳам лавозимлар ва бюджетдан фойдаланиш имкониятига эга бўлган.

Қариндошлар сони учинчи авлодгача етиб борган. Булар орасида отаси томонидан амакиваччалари — Игорь ва марҳум Евгений Путин, онаси томонидан холаси Любовь Шеломова ва яна бир қариндоши Любовь Круглова бор. Шунингдек, Анна Цивилёва, Сергей Цивилёв, Михаил Путин ва бошқа Путинлар — ҳозирда давлат компаниялари ёки ҳукумат тизимида катта вазифаларда ишлайди.

Вафот этган Евгений Путиннинг набиралари — Денис Путин, Дмитрий Логинов ва Елена Жидкова ҳам катта давлат вазифаларида бўлиб, бюджет маблағларига кенг йўл очилган.

Путиннинг моддий манбалари сифатида кўриладиган бошқа қариндошлари — Михаил Шеломов, Роман Путин ва бошқалар — «Русгидро», «Газпром», «Сибур», «Промсвязбанк» ва РЖД каби йирик компанияларда ишлайди. Улар айни вақтда санкция остидаги тузилмаларда фаолият юритиб, шахсий бойликларни йиғмоқда.