Николас Мадуро ва рафиқасининг иккинчи суди бўлиб ўтди

Кеча, 26-март куни Америка Қўшма Штатларининг Ню-Йорк федерал судида Венесуэланинг собиқ етакчиси Николас Мадуро ва унинг рафиқаси Силия Флорес иштирокида навбатдаги суд мажлиси бўлиб ўтди. Бу уларнинг АҚШ ўғирлаб кетганидан кейин иккинчи бор омма олдида кўринишидир.

Суд залига кириб келган Мадуронинг қўлларида кишан бўлмаган. У маҳбуслар учун мўлжалланган кийимда бўлса-да, ўзини анча хотиржам тутган ва ҳатто адвокатларига қараб жилмайиб қўйган. Мадуронинг ташқи кўриниши ва ҳаракатлари босиқ кайфиятни акс эттирган.

Унинг рафиқаси, Венесуэланинг собиқ «биринчи хоним»и Силия Флорес ҳам суд залида бўлган. Гувоҳларнинг таъкидлашича, жараён давомида эр-хотин бир-бирлари билан гаплашишмаган.

Эслатиб ўтамиз, 3-январга ўтар кечаси Каракасда портлашлар юз берган эди. Шундан сўнг Трамп АҚШ кенг кўламли зарбалар берганини, Венесуэла президенти Николас Мадурони эса қўлга олиб, рафиқаси билан бирга мамлакатдан олиб чиқиб кетганини маълум қилган.

5-январ куни Мадуро ва унинг рафиқаси Ню-Йорк судида чиқиш қилиб, ўзларига қўйилган айбловлар бўйича айбни тан олмасликларини билдиришди. Шунингдек, Мадуро ўзини «ҳарбий асир» деб атади.

Мадуро ва рафиқасининг ҳимоячилари АҚШ ҳукумати томонидан жорий этилган санкциялар туфайли юридик хизматлар учун тўловлар чекланаётганини айтиб, бу ҳолат айбланувчиларнинг адвокат танлаш ҳуқуқини чеклаётганини таъкидламоқда. Улар суддан жиноий таъқибни тўхтатишни талаб қилмоқда.