Кибержиноятчилар ўмарган 1,9 трлн сўм, очиқ қолган камералар ва 2026 йилги узоқ дам олиш кунлари — 24 декабр дайжести

Президент байрамда ўзбекистонликлар неча кун дам олишини белгилади

Президент фармони билан 2026 йилда расмий саналарни нишонлаш давридаги қўшимча дам олиш кунлари белгиланди. Ушбу ҳужжатга кўра, Янги йил байрами муносабати билан ўзбекистонликлар кетма-кет 5 кун дам олишади. Дам олиш кунлари 2025 йил 31 декабрдан бошланиб, 2026 йилнинг 4 январига қадар давом этади. Шунингдек, йил давомида май ва август ойларида ҳам қўшимча ишланмайдиган кунлар тақдим этилади.

Фармонда иш ҳафтасининг туридан қатъи назар, барча ходимлар учун 2 январь, 28-29 май ва 31 август кунлари қўшимча дам олиш кунлари сифатида мустаҳкамланди. Олти кунлик иш ҳафтасида ишлайдиганлар учун эса байрамлар оралиғидаги бошқа тегишли кунлар ҳам дам олиш куни сифатида киритилган.

Хавотирга ўрин йўқми? ИИВ йўлларидаги камералар интернетда очиқ қолганини рад этди

АҚШнинг «TechCrunch» нашри киберхавфсизлик бўйича тадқиқотчи Анураг Сеннинг маълумотларига таяниб, Ўзбекистондаги йўл камералари тўплаган миллионлаб маълумотлар базаси интернетда паролсиз очиқ қолганини даъво қилди. Нашрнинг таъкидлашича, ушбу очиқ базада автомобил рақамлари, ҳайдовчи ва йўловчиларнинг юзлари акс этган кадрлар мавжуд бўлиб, айрим шахсларнинг ҳаракат йўналишини олти ой давомида кузатиш имкони бўлган. Шунингдек, тизимда қоидабузарликларни реал вақтда кузатувчи махсус панел борлиги ҳақида хабар берилди.

Ўзбекистон Ички ишлар вазирлиги ушбу иддаоларни қатъиян рад этиб, тизим 3 босқичли киберхавфсизлик ҳимоясига эга эканини маълум қилди. Вазирлик ва Киберхавфсизлик маркази ўтказган текширув натижасида тизимда заифликлар ёки шахсга доир маълумотларнинг сизиб чиқиши аниқланмаган. Таъкидланишича, фуқаролар ўз жарималарини кўрадиган cloud.yhxx.uz саҳифаси хавфсиз бўлиб, у ерда шахсий маълумотлар мавжуд эмас, камераларнинг локацияси ҳақидаги маълумотлар эса очиқ манба ҳисобланади.

Ўзбошимчалик билан қурилган уйларни расмийлаштириш муддати қисқартирилади

Адлия вазирлиги томонидан ишлаб чиқилган янги қонун лойиҳасига кўра, ўзбошимчалик билан қурилган уй-жой ва объектларга бўлган ҳуқуқни эътироф этиш муддатини 150 кундан 50 кунгача қисқартириш таклиф этилмоқда. Ушбу ташаббус 2024 йилдаги қонун ижроси давомида аниқланган ортиқча вақт талаб қилувчи тўсиқларни бартараф этишга қаратилган. Янги тартибда ваколатли ташкилотларга 20 кун, жамоатчилик муҳокамасига 10 кун ва адлия органларига 20 иш куни ажратилиши режалаштирилган.

Шу билан бирга, ҳуқуқни эътироф этишга тўсқинлик қилаётган солиқ қарздорлиги масаласи бўйича ҳам енгилликлар кўзда тутилмоқда. Агар солиқ қарзи БҲМнинг 30 бараваридан ошмаса, ҳуқуқни тиклашга рухсат берилади ҳамда бир марталик тўловни 20 кун ичида тўлаганларга 50 фоизлик чегирма тақдим этилади. Шунингдек, тўловларни 1 йилдан 3 йилгача бўлиб тўлаш имконияти яратилиши фуқароларнинг йиллар давомида ҳал бўлмай келаётган мулкий масалаларини тезкорлик билан қонунийлаштиришга хизмат қилади.

Ногиронлиги бўлганлар учун молиявий хизматлар янада қулайлашади

Марказий банк ва Ижтимоий ҳимоя миллий агентлиги ногиронлиги бўлган шахслар учун молиявий хизматлар оммабоплигини ошириш бўйича қўшма «Чора-тадбирлар режаси»ни имзоладилар. Мазкур ҳужжат доирасида банк бинолари, хизмат кўрсатиш нуқталари ва рақамли платформалар инклюзивлик талаблари асосида тўлиқ хатловдан ўтказилади. Асосий мақсад — банк инфратузилмасини жисмоний эҳтиёжларга мослаштириш ва ахборот материалларини барча учун қулай форматларда тақдим этишдан иборат.

Шу билан бирга, режада ногиронлиги бўлган шахсларнинг молиявий саводхонлигини ошириш ва улар учун махсус ўқув материалларини ишлаб чиқишга алоҳида эътибор қаратилган. Молиявий ташкилотлар ходимлари учун ушбу тоифадаги мижозлар билан ишлаш бўйича алоҳида йўриқномалар жорий этилади. Бу ислоҳотлар 2029 йилгача ташкил этиладиган ҳудудий ижтимоий хизматлар марказлари фаолияти билан уйғунлашган ҳолда, мамлакатда тўлиқ инклюзив молиявий тизимни яратишга хизмат қилади.

2025 йилда Ўзбекистонда кибержиноятлар ортидан 1,9 трлн сўм ўғирланди

Ички ишлар вазири ўринбосари Рамазон Ашраповнинг маълумотига кўра, 2025 йилнинг 11 ойи давомида кибержиноятчилар ўзбекистонликларнинг 1,9 трлн сўм маблағини ўзлаштирган. Охирги беш йил ичида бу турдаги жиноятлар сони 11 баробарга ошиб, 62 мингдан ортиқ ҳолатни ташкил этган. Таъкидланишича, йил давомида етказилган умумий моддий зарар 3,73 трлн сўмга етган бўлиб, унинг тенг ярми айнан жорий йил ҳиссасига тўғри келмоқда.

Кибержиноятларга қарши курашиш доирасида махсус рақамли лаборатория томонидан 483 та хавфли фишинг дастури аниқланиб, уларнинг фаолияти чекланди. Шунингдек, криптоактивлар билан боғлиқ 2,4 мингдан зиёд жиноят фош этилиши натижасида 76 млрд сўм маблағнинг мамлакатдан ноқонуний чиқиб кетиши олди олинди. Ҳозирда мамлакатда содир этилаётган жами жиноятларнинг қарийб 42 фоизи айнан кибермакондаги ҳуқуқбузарликлар ҳиссасига тўғри келмоқда.