AQSH hujumidan so‘ng Eronning yangi rahbarining ko‘rinishiga putur yetgan — OAV
AQSH zarbasidan yuzidan jarohatlangani va oyoqlaridan ayrilgani aytilayotgan Eronning yangi Oliy rahbari mamlakatni yashirincha boshqarmoqda. Uning haqiqiy ahvoli qanday?
Eronning yangi Oliy rahbari etib tayinlangan Mo‘jtabo Xomanaiy Tehron markazidagi qarorgohga berilgan AQSH aviazarbasi oqibatida yuzi va oyoqlaridan jiddiy jarohat olgan. Shunga qaramay, u mamlakatni boshqarishda davom etmoqda.
«Reuters» agentligining Xomanaiyning yaqin atrofidagi uchta manbaga tayanib xabar berishicha, yangi rahbarning aqli-hushi joyida va u davlat boshqaruvini yo‘qotmagan. Garchi uning yuzi tanib bo‘lmas darajada o‘zgargan va bir yoki ikki oyog‘idan ayrilgan bo‘lsa-da, u o‘z vazifalarini bajarmoqda.
56 yoshli Mo‘jtabo Xomanaiy yuqori martabali amaldorlar bilan faqat audiokonferensiyalar orqali muloqot qilmoqda. U urush va AQSH bilan muzokaralar kabi eng muhim masalalar bo‘yicha qarorlar qabul qilishda bevosita ishtirok etmoqda.
Eron rasmiylari rahbarning jarohatlari haqida hali rasmiy bayonot bermagan. Ammo 8-mart kuni u Oliy rahbar etib tayinlangach, davlat telekanallarida uni urushda og‘ir yaralanganlarga nisbatan ishlatiladigan termin bilan atay boshlashdi.
Pentagon va razvedka
AQSH Mudofaa vaziri Pit Hegset avvalroq Mo‘jtabo Xomanaiyning yaralangani, yuzi majruhlangani va yashirinib yurganini ta’kidlagan edi. Prezident Donald Tramp esa uning tirikligiga ham shubha bildirgan.
Amerika razvedkasi ma’lumotlari bilan tanish bo‘lgan manbalarga ko‘ra, yangi yetakchi oyoqlaridan birini yo‘qotgan. Eron muxolifati esa uning komada ekanini yoki davolanish uchun Moskvaga yashirin reys bilan olib ketilganini iddao qilmoqda.
Yaqin manbalar uning bir-ikki oy ichida sog‘lig‘i va xavfsizlik holati izn bersa, ommaga ko‘rinishini aytmoqda.
Halokatli aviazarba tafsilotlari
Eronning yangi rahbari 28-fevral kuni AQSH va Isroilning qo‘shma operatsiyasining birinchi kunida yaralangan edi. Bu halokatli zarba natijasida 1989 yildan beri davlatni boshqarib kelgan uning otasi Oyatulloh Ali Xomanaiy halok bo‘ldi.
Ushbu hujumda Mo‘jtabo Xomanaiyning rafiqasi, kuyovi va kelini ham qurbon bo‘lgan. Aynan shu mudhish voqeadan so‘ng, umuman hech qanday foto, video yoki audio yozuvlar e’lon qilinmadi.
Hozirda bu ma’lumotlar Pokistonda AQSH bilan boshlangan o‘ta muhim tinchlik muzokaralari fonida tarqalmoqda.
