Аукционга чиқарилган университет бинолари, хавфсиз ҳудудларга кўчириладиган «заправкалар» ва янги тартибда тўланадиган касаллик пули — 29 июн дайжести

1-сентабргача кўчириладиган «заправкалар» рўйхати тузилади

Вазирлар Маҳкамасининг қарорига кўра, 1 сентябрга қадар хавфсизлик, шаҳарсозлик ва экологик талабларни бузган ҳамда аҳоли ҳаётига хавф туғдираётган ёқилғи қуйиш шохобчаларининг ягона реестри шакллантирилади. Шундан сўнг уларни босқичма-босқич хавфсиз ҳудудларга кўчириш ишлари бошланади. 2025 йилда 6196 та объект текширилиб, 46,7 мингдан ортиқ қоидабузарлик аниқланган, 464 та шохобча фаолияти эса вақтинча тўхтатилган.

Қарорга мувофиқ, 1 сентябрдан хизмат муддати тугаган ёки хавфли ускуналардан фойдаланиш тақиқланади. Шунингдек, газ қуйиш шохобчаларида автомобил газ баллонларининг техник кўрикдан ўтгани Eco-Himoya ва U-Gas тизимлари интеграцияси орқали онлайн текширилади. Кўчириш жараёнида тадбиркорларнинг ер участкаларига бўлган ҳуқуқлари сақлаб қолинади.

Тошкентдаги Низомий университетининг яна иккита биноси аукционга қўйилди

Давлат активларини бошқариш агентлиги Низомий номидаги Миллий педагогика университетининг Табиий фанлар ва Филология факультетлари биноларини E-auksion орқали сотувга чиқарди. Табиий фанлар факультетининг бошланғич нархи 325,9 млрд сўм, Филология факультетиники эса 141,1 млрд сўм этиб белгиланган. Ҳар икки объектни харид қилган инвестор улар негизида нодавлат таълим муассасасини ташкил этиши шарт.

Аукцион савдолари 20 июль куни бошланиши режалаштирилган. Бинолар 2027 йил 31 декабргача ёки университетнинг Янги Тошкентдаги кампуси фойдаланишга топширилгач бўшатилиши кўзда тутилган. Бунгача университетнинг асосий кампуси ҳамда яна қатор бинолари хусусийлаштириш дастури доирасида аукционга чиқарилган эди.

Ўзбекистон ва Қозоғистон чегарасидаги иккита ўтказиш пункти халқаро мақомга эга бўлади

Қозоғистон Сенати Ўзбекистон билан чегарадаги ўтказиш пунктлари тўғрисидаги битимга киритилган ўзгаришларни ратификация қилди. Унга кўра, «Сирдарё—Малик» ва «Селинний—Оқ олтин» автомобил ўтказиш пунктларининг мақоми халқаро даражага ўзгартиради ва улар 24 соатлик иш режимига ўтади. Бу чегарадан ўтиш жараёнини тезлаштириш ҳамда транспорт оқимини самарали бошқаришга хизмат қилади.

Янги тартибга кўра, «Селинний—Оқ олтин» орқали енгил автомобиллар, бўш юк машиналари ва йирик юклар ҳаракатланиши мумкин бўлади. «Сирдарё—Малик» пункти эса енгил автомобиллар ва бўш юк транспортлари учун очиқ бўлади, аммо у орқали тижорат юкларини олиб ўтишга рухсат берилмайди.

Ўзбекистон ФИФА рейтингида 10 поғона пастлади

2026 йилги Жаҳон чемпионатидаги омадсиз иштирокдан сўнг Ўзбекистон миллий терма жамоаси ФИФАнинг онлайн рейтингида 50-ўриндан 60-ўринга тушди. Жамоа қарийб 49 рейтинг очкосини йўқотиб, 1409,73 балл тўплади. Бу натижа билан Ўзбекистон Саудия Арабистони ва Қатардан кейин жойлашди.

Жаҳон чемпионатида Ўзбекистон К гуруҳидаги учала учрашувда ҳам мағлубиятга учраб, икки гол урди ва ўз дарвозасидан 11 та тўп ўтказиб юборди. ФИФАнинг мазкур рейтинглари ҳозирча дастлабки ҳисобланади, расмий янгиланган рейтинг эса 20 июл куни эълон қилиниши кутилмоқда.

Энди касаллик нафақалари давлат ижтимоий суғуртаси орқали тўланади

2026 йил 1 июлдан бошлаб Ўзбекистонда вақтинча меҳнатга лаёқатсизлик нафақаларини тўлашнинг янги тартиби жорий этилади. Энди касалликнинг дастлабки беш куни учун нафақани иш берувчи, олтинчи кундан бошлаб эса Давлат ижтимоий суғурта жамғармаси тўлайди. Янги тартиб мажбурий давлат ижтимоий суғуртаси билан қамраб олинган ва камида олти ойлик суғурта стажига эга ходимларга татбиқ этилади.

Янги қоидаларга кўра, суғурта стажи 6 ойдан 8 йилгача бўлганларга ўртача иш ҳақининг 60 фоизи, 8 йилдан ортиқ стажга эга ходимларга эса 80 фоизи миқдорида нафақа тайинланади. Барча жараёнлар электрон тарзда амалга оширилади: ариза талаб қилинмайди, нафақалар эса «Барака» тизими орқали автоматик очиладиган виртуал картага ўтказилади.