Ҳаво ҳароратининг пасайиши сабабли метан-шохобчалар фаолияти чекланиши мумкин
Ўзбекистонда 9–11-ноябр кунлари кутилаётган совуқ об-ҳаво ва ҳароратнинг кескин пасайиши туфайли автомобилларга газ тўлдириш компрессор шохобчалари (АГТКШ) фаолиятига вақтинчалик чекловлар киритилиши мумкин.
© Foto: Vaqt.uzЎзбекистонда келгуси ҳафта бошида ҳаво ҳарорати пасайиши муносабати билан автомобилларга газ тўлдириш компрессор шохобчалари (метан-шохобчалар) фаолияти вақтинча чекланиши мумкин. Бу ҳақда Энергетика вазирлиги хабар берди. Бу ҳақда Ўзбекистон Республикаси Энергетика вазирлиги маълум қилди.
«Ўзгидромет» хизматининг прогнозига кўра, 9–11-ноябр кунлари мамлакат бўйлаб ёмғир ёғиши, шимолий ва тоғли ҳудудларда эса қор ёғиши кутилмоқда. Тунги вақтларда ҳарорат шимолда −7 даражагача, айрим бошқа ҳудудларда эса −1…−2 даражагача пасаяди.
Устуворлик ижтимоий объектлар ва аҳолига берилади
Энергетика вазирлигининг қайд этишича, об-ҳаво совиганда табиий газ таъминотида биринчи навбатда аҳоли хонадонлари, мактаблар, мактабгача таълим ташкилотлари, шифохоналар ва бошқа ижтимоий объектларга устуворлик берилади.
Шу сабабли, тизимда юклама ортиб кетишининг олдини олиш мақсадида, зарурат туғилган тақдирда, мавсумий истеъмолчилар, хусусан, метан-шохобчалар фаолияти вақтинча чекланади.
«Чекловлар ҳокимликлар билан келишилган, тасдиқланган графиклар асосида жорий этилади. Истеъмолчилар олдиндан хабардор қилинади», — дейилади вазирлик хабарида.
Хавфсизлик чоралари ва алоқа тармоқлари
Иситиш мавсуми бошланиши муносабати билан Энергетика вазирлиги аҳолини хавфсизлик қоидаларига қатъий риоя қилишга чақирди. Жумладан, иситиш ва газ жиҳозлари, мўри ҳамда шамоллатиш йўлларининг созлигини текшириш, хонани иситиш мақсадида газ плиталаридан фойдаланмаслик (бу ис газидан заҳарланишга олиб келиши мумкин) ва иситиш жиҳозларини назоратсиз қолдирмаслик сўралмоқда.
Шунингдек, сим ва розеткаларга ортиқча юклама бермаслик, бир нечта юқори қувватли қурилмани битта узайтиргичга уламаслик лозимлиги таъкидланди.
«Тежамкорлик ҳам муҳим: кераксиз электр жиҳозларини ўчиринг, иситкичлардан меъёрида фойдаланинг ва уйдаги иссиқликни сақланг. Бу оилавий харажатларни камайтиради ва тармоқлардаги юкламани пасайтиради», — дейилади хабарда.
Агар истеъмолчиларда газ ёки электр энергияси билан боғлиқ муаммолар юзага келса, сутканинг исталган вақтида қуйидаги махсус рақамларга мурожаат қилиш мумкинлиги эслатиб ўтилди:
Газ босими ва таъминоти бўйича: 1104
Газ авария хизмати: 104
Электр узилишлари ва тармоқ носозликлари: 1154
Бундан ташқари, ноқонуний уланиш ёки энергия ресурсларидан талон-торож қилиш ҳолатларига гувоҳ бўлган фуқаролардан Энергоинспексиянинг +998 71 208-10-15 ишонч рақамига хабар бериш сўралган.
