Криптобозорда қулаш: Биткоин ўз қийматининг деярли учдан бир қисмини йўқотди
Сентябр ойи охирида 87 минг доллар атрофида савдо қилинган биткоин қисқа муддат ичида 2024 йил ёзидаги даражага қайтди.

Дунёдаги энг йирик криптовалюта — биткоин нархи сўнгги ҳафталарда кескин пасайди. 2026 йил сентябр ойининг охирида 87 минг доллар атрофида савдо қилинган BTC 15 ноябр куни 62 022 долларгача тушди. Бу қарийб 29 фоизлик пасайиш бўлиб, криптовалюта қиймати 2024 йил ёзидаги даражага қайтди.
19 ноябр ҳолатига кўра, биткоин 62 минг 600 доллар атрофида савдо қилинмоқда. Бироқ нархнинг бироз тикланиши бозордаги кайфият ўзгарганини англатмайди. Инвесторлар АҚШ Федерал захира тизимининг фоиз ставкаси бўйича қарорларини, криптовалюта фондларидан маблағ чиқишини ва соҳадаги йирик хавфсизлик ҳодисаларини диққат билан кузатмоқда.
«Forbes» нашри таҳлилига кўра, биткоиннинг пасайишига бир нечта омил бир вақтнинг ўзида таъсир кўрсатган.
АҚШда фоиз ставкалари ошиши хавфи кучайди
Биткоин нархига босим ўтказаётган асосий омиллардан бири — АҚШдаги пул сиёсатига оид кутилмалардир. АҚШ Федерал захира тизими (ФЗТ) фоиз ставкаларини ошириши ёки юқори даражада сақлаб туриши мумкин. Бундай тахминлар инвесторларнинг рискли активларга бўлган муносабатини ўзгартирди.
2026 йил октябр ойида АҚШдаги базавий инфляция кутилганидан юқори чиқди. Шу сабабли молия бозори иштирокчилари декабр ойида ФЗТ фоиз ставкасини ошириши эҳтимолини ҳам ҳисобга ола бошлади.
«RBC Crypto» ва «CoinDesk» маълумотларига кўра, 17–18 ноябр кунлари бозор фючерслари бундай қарор эҳтимолини 92–96 фоиз оралиғида баҳолаган.
«Binance»га қилинган 6,3 млрд долларлик хакерлик ҳужуми бозорга таъсир қилди
Биткоин пасайишига ҳамроҳ бўлган яна бир йирик воқеа — дунёдаги энг катта криптовалюта биржаларидан бири «Binance»га қарши амалга оширилган киберҳужумдир.
2026 йил 29 октябрда биржанинг криптовалюта ҳамёнларидан тахминан 6,36 млрд долларлик активлар ўғирланди. «Chainalysis» ва «TRM Labs» каби блокчейн таҳлил компаниялари ҳужумни Шимолий Корея билан боғлиқ «TraderTraitor» хакерлик гуруҳи амалга оширган бўлиши мумкинлигини билдирди.
«Associated Press» хабарига кўра, «Binance» зарарни қоплаш учун ўз маблағларидан 6,34 млрд доллардан ортиқ захира ажратганини маълум қилган. Биржа ҳамкорлари билан биргаликда ўғирланган активларнинг қарийб 3 млрд долларини музлатишга ҳам эришган.
Бу ҳодиса криптовалюта бозорида хавфсизлик ва марказлашган биржаларга ишонч масаласини яна кун тартибига олиб чиқди. «Bloomberg»нинг 18 ноябрдаги таҳлилига кўра, ҳужумдан кейин биткоин бозорининг ликвидлиги сезиларли ёмонлашган. «Talos» компанияси маълумотларига кўра, биткоиннинг жорий нархидан 1 фоиз юқори ва пастдаги буюртмалар ҳажми ҳужумдан олдинги йиллик юқори кўрсаткичга нисбатан қарийб 38 фоизга қисқарган.
«Anthropic» IPOси ҳам сотувларга таъсир қилган бўлиши мумкин
«Forbes» мақоласида биткоин пасайишига таъсир қилган эҳтимолий омиллардан яна бири сифатида сунъий интеллект компанияси — «Anthropic»нинг бирламчи оммавий акциялар жойлаштириши (IPO) тилга олинган.
«ViaBTC» компаниясининг бош таҳлилчиси Жефф Ко айрим инвесторлар «Anthropic» IPOсида қатнашиш учун биткоин каби ликвид активларини сотиб, маблағ бўшатган бўлиши мумкинлигини тахмин қилди. «Binance» асосчиси Чанпен Чжао ҳам ушбу йўналишдаги эҳтимолий капитал оқимига эътибор қаратди. Бироқ инвесторлар биткоинни айнан IPO учун сотганини тасдиқловчи расмий маълумот йўқ.
«Anthropic» компанияси 18 ноябр куни ўз акцияларининг IPO нархини 83 доллар этиб белгилади. Акциялар 19 ноябрдан «Nasdaq Global Select Market» биржасида «ANT» белгиси остида савдога чиқиши режалаштирилган. IPO доирасида жами 980 млн дона «А» тоифасидаги акция таклиф этилган.
Биткоинни нима кутмоқда?
Таҳлилчилар нархнинг кейинги ҳаракати бўйича турли сценарийларни кўриб чиқмоқда. «Wintermute» 60 минг доллар даражасини муҳим чегара сифатида баҳолаган. «CoinShares» таҳлилчилари эса кучли ташқи омил пайдо бўлмагунча бозор 60–90 минг доллар оралиғида ҳаракатланиши мумкинлигини билдирган. Булар фақат бозор иштирокчиларининг тахминлари ҳисобланади.
Биткоиннинг барқарор тикланиши учун инвесторлар талабининг қайтиши ва АҚШ Федерал захира тизими сиёсатидаги ноаниқликнинг камайиши муҳим омиллар бўлиб қолади.





