Rossiyada kredit kartalari stavkalari 50 foizdan oshdi

2026 yil yanvar holatiga ko‘ra, Rossiya banklari jismoniy shaxslar uchun kredit kartalari bo‘yicha o‘rtacha to‘liq kredit qiymatini 50,38 foizgacha oshirdi. Bu Birlashgan kredit byurosi (OKB) ma’lumotlarida aks etgan.

50 foizlik chegara ikkinchi oy ketma-ket saqlanmoqda va bu kamida 2021 yildan beri eng yuqori ko‘rsatkich hisoblanadi. 2025 yil yanvarga nisbatan o‘rtacha stavka qariyb 8 foiz punktga oshgan. Shu bilan birga, Markaziy bankning asosiy stavkasi shu davrda 21 foizdan 15,5 foizga tushgan.

Birlashgan kredit byurosi bosh direktori Mixail Aleksinning aytishicha, 2025 yilning birinchi yarmida stavkalar 44 foiz atrofida bo‘lgan bo‘lsa, ikkinchi yarmidan 48 foiz va undan yuqori darajaga chiqqan. Shunga qaramay, bir yil ichida 14,59 millionta kredit karta rasmiylashtirilgan, ularning umumiy limiti 1,7 trln rublni tashkil etgan. Mamlakatda kredit karta foydalanuvchilari soni 28 million kishiga yetgan.

Karta chiqarish soni keskin pasaydi

2026 yil yanvarda yangi kredit kartalari berish hajmi 969,4 ming shartnomagacha qisqardi. Bu so‘nggi to‘rt yil ichidagi eng past ko‘rsatkichdir.

Kredit kartalari bo‘yicha umumiy limit 100,08 mlrd rublni tashkil etdi. Bu dekabr oyiga nisbatan 32 foizga, 2025 yil yanvarga nisbatan esa 24 foizga kam.

Banklar portfelni oshirishga shoshilmayapti. Aleksin ta’kidlashicha, 2025 yil davomida muddati o‘tgan qarzlar hajmi o‘sgan va «kredit xavfining tabiiy amalga oshishi» kuzatilgan.

Qarz yuki ortib bormoqda

Rossiya Markaziy banki ma’lumotiga ko‘ra, 1-yanvar holatiga muammoli iste’mol kreditlari 1,7 trln rublga, ipoteka kreditlari esa 400 mlrd rublga yetgan.

Yil boshida rossiyaliklarning bank tizimi oldidagi jami qarzi 38,67 trln rublni tashkil etgan. Shundan 21,67 trln rubl ipoteka qarzlariga to‘g‘ri keladi. Bir yil ichida aholi qarzdorligi 1,1 trln rublga oshgan.