Трамп қўлларидаги кўкаришларни қандай яшираётганини маълум қилди

АҚШ Президенти Доналд Трамп жамоатчиликнинг соғлиғига бўлган ҳаддан ташқари эътибори туфайли қўлларидаги кўкаришларни пардоз воситалари ёрдамида яшираётганини тан олди.

79 ёшли Америка етакчиси The Wall Street Journal нашрига берган интервюсида қўлларининг орқа қисмига махсус тонал крем суртишини маълум қилди. Трампнинг сўзларига кўра, бу жараён атиги ўн сония вақт олади ва ташқи кўринишидаги камчиликларни тезкорлик билан бартараф этиш имконини беради.

Президент қўлларида кўкаришлар пайдо бўлишига кўп йиллардан буён юқори дозада аспирин қабул қилаётгани асосий сабаб эканини тушунтирди. У қоннинг қуюқлашиб кетишидан сақланиш ва юрак фаолиятини яхшилаш мақсадида ушбу дори воситасини мунтазам ичиб келаётганини таъкидлаб ўтди.

Оқ уй шифокори Шон Барбабелланинг нашрга тасдиқлашича, Доналд Трамп ҳар куни 325 мг аспирин қабул қилмоқда. Бу кўрсаткич тиббиёт мутахассислари томонидан тавсия этилган одатий меъёрдан анча юқори ҳисобланиб, тери остида қон талашишлар юзага келишига бевосита таъсир кўрсатади.

Кузатувчилар президентнинг оммавий тадбирларда, хусусан, молиявий ёрдам тўғрисидаги фармонларни имзолаш жараёнида қўлларини яширишга уринганини бир неча бор пайқашган. Баъзи ҳолларда у жароҳат изларини тонал крем билан ёпган бўлса, бошқа вазиятларда қўлларини стол остига яширишга ҳаракат қилган.

Аввалроқ, Оқ уй матбуот котиби Кэролайн Ливитт ушбу ҳолатни тез-тез қўл бериб кўришишлар билан изоҳлаган эди. Шунга қарамай, шифокорлар ўтган йилнинг ёзида Трампда сурункали вена етишмовчилигини аниқлашган, бироқ президентнинг умумий саломатлиги ва когнитив қобилияти аъло даражада эканини қайд этишган.