Туркия Трамп санкцияларидан кейин Россия нефтидан воз кеча бошлади
АҚШ президенти Москвага қарши жорий этган янги санкциялардан кейин Туркиянинг йирик нефт қайта ишлаш заводлари Россия нефт маҳсулотларини бошқа давлатлар хомашёси билан алмаштира бошлади.
Вашингтоннинг Россияга қарши янги чекловларидан сўнг Туркиянинг катта нефт қайта ишлаш корхоналари Россия нефтдан воз кечиб, бошқа давлатлардан хомашё олишга ўтди. Бу ҳақда Reuters агентлиги ўз манбаларига таяниб хабар берди.
Маълумотларга кўра, Туркиядаги энг йирик заводлардан бири — Озарбойжонга тегишли SOCAR компаниясининг SOCAR Turkey Aegean Refinery (STAR) заводи — декабр ойи учун Ироқ, Қозоғистон ва бошқа мамлакатлардан тўртта партия нефт сотиб олди. Бу миқдор кунлик 77 мингдан 129 минг баррелгача бўлиб, заводдаги россиялик нефт улушини кескин камайтиради. Сентябр ва октябр ойларида STAR заводида қайта ишланган кунлик 210 минг баррел нефтнинг деярли барчаси Россиядан келган эди.
Туркиядаги яна бир йирик компания — Tupras ҳам Россиядан ташқари манбалардан нефт харид қилишни кўпайтирди. Reuters манбаларига кўра, компаниянинг бир заводи яқин вақтда Россия нефтни қайта ишлашни тўлиқ тўхтатади, чунки Европага экспортда санкция қоидаларини бузмаслик керак. Tupras илк бор Бразилиядан нефт сотиб олди, ноябр бошида эса Анголанинг Mostarda навли нефт партиясини қабул қилиши кутилмоқда.
Kpler маълумотларига кўра, ноябр ойида Туркия Ироқдан кунлик 141 минг баррел нефт олиши режалаштирилган — бу октябрдаги 99 минг ва йиллик ўртача 80 минг баррел кўрсаткичидан анча юқори. Январдан октябргача мамлакат умумий 669 минг баррел нефт импорт қилган бўлиб, шундан 317 минг баррели (47 фоизи) Россияга тўғри келган. Ўтган йили бу кўрсаткич 580 минг баррелдан 333 минг баррелни ташкил этган.
Туркия, Хитой ва Ҳиндистон билан бирга, Россия нефтининг сўнгги асосий харидорларидан бири ҳисобланади. Reuters таъкидлашича, турк заводларининг бу қарорлари АҚШ, ЕИ ва Британиянинг Россия нефт савдосини чеклаш ва уни Украинадаги урушни молиялаштиришда фойдаланишнинг олдини олишга қаратилган саъй-ҳаракатларидан таъсирланган.
22 октябрда АҚШ президенти Доналд Трамп Кремлнинг урушни тўхтатишдан бош тортганидан сўнг «Роснефт», «Лукойл» ва уларнинг 34 та шуъба компанияларига қарши санкциялар жорий этган эди. АҚШ Молия вазирлиги операцияларни тўхтатиш учун бир ойлик муҳлат берди.
Бу қарордан кейин Ҳиндистондаги бир нечта НҚИЗ — Mangalore Refinery and Petrochemicals, HPCL-Mittal Energy ва Reliance Industries ҳам Россия нефт харидини тўхтатди. Indian Oil Corp молия директори Ануй Жайн эса компания санкция талабларига зид бўлмаган ҳолда нефт олишни давом эттиришини маълум қилди.
