Хитой миллиардерларидан янги тренд: АҚШда суррогат она орқали фарзандли бўлиш

The Wall Street Journal нашрига кўра, сўнгги йилларда Хитойнинг бир қатор миллиардерлари АҚШда суррогат оналик хизматларидан фойдаланиб, кўп сонли фарзандли бўлишни йўлга қўймоқда. Айримлари эркак ворислар, бошқалари эса нуфузли оилалар билан никоҳ орқали алоқалар ўрнатиш мақсадида қиз фарзандларни танламоқда.

Хитой қонунчилигида суррогат оналик тақиқлангани сабабли, бундай имкониятни истаган бой қатлам вакиллари АҚШга мурожаат қилмоқда. Бундай мижозлар орасида йирик корпорациялар раҳбарлари, ёши катта шахслар ва анъанавий оила қуришни истамайдиган жуфтликлар бор.

АҚШда ушбу талаб атрофида тўлиқ инфратузилма шаклланган: суррогат оналик агентликлари, юридик компаниялар, клиникалар, болалар парвариши билан шуғулланувчи хизматлар фаолият юритмоқда. Айрим ҳолатларда ота-оналар АҚШга бормасдан, фақат генетик материал юбориб, 200 минггача долларгача тўлаб фарзандли бўлиш имконига эга.

Аввалроқ бу усул орқали хитойликлар «бир оила — бир фарзанд» сиёсати чекловларини четлаб ўтишган: АҚШда туғилган болалар Хитой фуқароси ҳисобланмаган. Ушбу сиёсат 2015 йилда бекор қилинган.

Нашрнинг қайд этишича, бугун айрим миллиардерлар орасида кўп фарзандли бўлиш ғояси оммалашмоқда. Масалан, видеоўйинлар ишлаб чиқарувчиси Сюй Бо ўзини «Хитойнинг биринчи отаси» деб атаб, асосан ўғил болалардан иборат юзга яқин фарзанди борлигини очиқ айтган.

Бошқа бир тадбиркор Ван Ҳуэйву эса АҚШда донор аёллар орқали 10 нафар қиз фарзандли бўлган ва келажакда уларни дунё етакчиларига турмушга беришни режалаштиргани айтилмоқда.

Айрим агентликлар эса бир вақтнинг ўзида кўплаб суррогат оналарни жалб қилиш истагидаги мижозларга хизмат кўрсатишни рад этмоқда. Улардан бири «биз супермаркет эмасмиз», деган изоҳ билан буюртмани қабул қилмаган.

Аввалроқ Хитой ўз иқтисодиётни жадал суръатда қайта қураётгани, энди у арзон ишлаб чиқариш манбаи эмас, балки электрга асосланган давлатга айланаётгани ҳақида хабар берган эдик.