Хитой НҚИЗлари Россия нефтининг қарийб ярмига бойкот эълон қилди
Хитойнинг йирик нефт компаниялари — Sinopec ва PetroChina Доналд Трамп маъмурияти жорий этган санкциялар ортидан Россия нефт импортини қисқартирди. Бойкот Москва экспортининг қарийб 45 фоизини қамраб олди.
Bloomberg агентлигининг ёзишича, Хитойдаги нефтни қайта ишлаш бўйича етакчи заводлар — Sinopec ва PetroChina АҚШ президенти Доналд Трамп ҳукуматининг янги санкцияларидан сўнг Россия нефт импортини қисқартиришни бошлади. Санкциялар доирасида «Роснефт» ва «Лукойл» каби Россиянинг икки энг йирик нефт компанияси қамраб олинган.
Трейдерлар маълумотига кўра, давлат НҚИЗлари бир нечта келишувларни бекор қилган ва ҳозирча янги харидлардан воз кечган. Шунингдек, айрим хусусий заводлар ҳам эҳтиёт чораси сифатида Россия нефтидан воз кечмоқда. Улар орасида Буюк Британия ва Европа Иттифоқининг «қора рўйхати»га киритилган Shandong Yulong Petrochemical ҳам бор.
Таҳлилчи компания Rystad Energy баҳолашича, бу «харидорлар бойкоти» Хитойга экспорт қилинаётган Россия нефт ҳажмининг 45 фоизини ташкил этади. Айниқса, Россиянинг Шарқий Сибир–Охотск порти орқали экспорт қилинадиган ESPO маркаси жиддий зарбага учради — унинг баҳоси Brent нефтга нисбатан баррелига 0,5 доллар чегирма билан таклиф қилинмоқда, ҳолбуки октябр бошларида сотувчилар 1 доллар мукофот талаб қилаётган эди.
Америка санкциялари нафақат Хитой, балки Ҳиндистон ва Туркия бозорларига ҳам таъсир кўрсатди. Ҳиндистондаги Mangalore Refinery and Petrochemicals, HPCL-Mittal Energy ва Reliance Industries каби йирик НҚИЗлар вақтинча Россия нефт харидини тўхтатди. Бироқ Indian Oil санкцияларга тушмаган Россия компанияларидан Urals маркасини харид қилишни қисқа танаффусдан сўнг қайта бошлади.
Туркияда ҳам шунга ўхшаш ҳолат кузатилмоқда — мамлакатнинг энг йирик НҚИЗи STAR Refinery Россия нефт ўрнига Ироқ ва Қозоғистондан хом ашё олишни бошлади. Tupraş эса Европага экспортни сақлаб қолиш учун ўз заводларидан бирида Россия нефтни тўлиқ рад этди.
Ҳозирги пайтда Россия нефт экспортининг асосий қисмини Хитой, Ҳиндистон ва Туркия ташкил этади. Bloomberg маълумотларига кўра, Хитой ҳар куни 1–1,5 млн баррел, Ҳиндистон 1,2–1,8 млн баррел, Туркия эса 300 минг баррел атрофида харид қилмоқда. Тўртинчи йирик харидор сифатида Сурия қайд этилган бўлиб, унга етказиб берилаётган ҳажм жуда кичик — бор-йўғи 35 минг баррел.
