«Kapitalbank» 50 million dollarlik korporativ obligatsiyalarni muomalaga chiqaradi
Obligatsiyalarni so‘ndirish naqd pulsiz hisob-kitoblar yo‘li bilan xorijiy valutada (AQSH dollarida) amalga oshiriladi.
© Foto: server-service.uz«Kapitalbank» ATB umumiy qiymati 50 million AQSH dollari bo‘lgan korporativ obligatsiyalarni ochiq obuna orqali joylashtirishni rejalashtirmoqda. Qimmatli qog‘ozlarning yillik daromadliligi 7 foizni tashkil etadi. Bu haqda Korporativ axborot yagona portalida ma’lum qilindi.
2026 yil 29-oktabr kuni bo‘lib o‘tgan bank aksiyadorlarining navbatdan tashqari umumiy yig‘ilishida mazkur qaror 100 foiz ovoz bilan ma’qullangan. Yig‘ilish bayonnomasiga ko‘ra, har birining nominal qiymati 100 AQSH dollari bo‘lgan jami 500 000 (besh yuz ming) dona foizli egasi yozilgan korporativ obligatsiyalar chiqariladi.
Obligatsiyalarni joylashtirish shartlari
Qimmatli qog‘ozlar tashkillashtirilgan qimmatli qog‘ozlar bozorida oldi-sotdi bitimlarini tuzish orqali sotiladi. Ushbu chiqarilishdagi obligatsiyalarni joylashtirish muddati qimmatli qog‘ozlar bozorini tartibga soluvchi vakolatli davlat organi tomonidan davlat ro‘yxatidan o‘tkazilgan sanadan boshlab 1 (bir) yil etib belgilandi.
Joylashtirish jarayoni emitent tomonidan «Kapital Securities» MCHJ investitsiya vositachisini anderrayter sifatida jalb qilgan holda amalga oshiriladi. Mazkur obligatsiyalar chiqarilishi bo‘yicha ta’minot taqdim etilishi ko‘zda tutilmagan.
Daromad to‘lovlari va muomala davri
Ma’lumotlarga ko‘ra, qimmatli qog‘ozlarning muomala davri muomalaga chiqarilgan sanadan boshlab 731 (yetti yuz o‘ttiz bir) kunni tashkil etadi.
Investorlarga to‘lanadigan voznagrajdeniye — kupon (foiz) daromadi yillik 7 foiz stavkasida belgilangan.
Daromad obligatsiyaning nominal qiymatidan kelib chiqib hisoblanadi va emitent tomonidan har bir kupon davri uchun to‘lab boriladi. Bitta kupon davri 3 (uch) oyni tashkil etib, muomala davri mobaynida jami 8 (sakkiz) ta kupon davri ko‘zda tutilgan.
Obligatsiyalarni so‘ndirish naqd pulsiz hisob-kitoblar yo‘li bilan xorijiy valutada (AQSH dollarida) amalga oshiriladi.
Ayni paytda aksiyadorlar tomonidan faqat chiqarish shartlari tasdiqlangan. Obligatsiyalarni amalda joylashtirish jarayoni vakolatli davlat organida ro‘yxatdan o‘tkazilganidan so‘ng boshlanadi.
