Кўп тил билиш мия қаришини секинлаштиради — Nature Aging тадқиқоти
Nature Aging журналида чоп этилган янги тадқиқотга кўра, икки ва ундан ортиқ тилда сўзлашувчи инсонлар кекса ёшда тез қариш хатаридан анча яхши ҳимояланган бўлади.
Халқаро олимлар жамоаси 27 та Европа давлатидаги 86 149 нафар инсон маълумотларини таҳлил қилди. Уларнинг ёшлари 51 ёшдан 90 ёшгача бўлган. Натижалар шундан далолат берадики, биргина тилда сўзлашувчиларда кексаликка оид неврологик сусайиш хавфи икки баробар юқори бўлар экан.
Олимлар таъкидлашича, кўп тилдан фойдаланиш миянинг кўп қиррали фаолиятини сақлашга ёрдам беради. Бу эса нафақат когнитив, балки жисмоний нуқсонларни ҳам кечиктиради. Бу таъсир спорт билан шуғулланиш ва мустаҳкам ижтимоий алоқаларнинг самарасига тенг.
Шу билан бирга, олимлар фарқларни фақатгина тил билиш билан изоҳлаб бўлмаслигини тан олади. Масалан, кўп тилли жамиятларда одатда фаол ҳаёт тарзи ва тўғри овқатланиш маданияти ҳам кузатилади. Аммо ҳатто бундай омиллар ҳисобга олинганда ҳам, кўп тиллиликнинг ижобий таъсири статистик жиҳатдан аҳамиятли бўлиб қолган.
Окленд университети профессори Стивен Мэйнинг таъкидлашича, дунё аҳолисининг 50–75 фоизи бир нечта тилда сўзлашади, бироқ инглиз тилида гаплашувчиларнинг аксари монолингвист бўлиб қолмоқда. Шунинг учун бу тадқиқот натижалари улар учун кутилмаган янгилик бўлиши мумкин.
