Xonandani o‘ldirishga targ‘ib qilgan videoroligi bloger uchun uzr so‘radi

Toshkent shahar IIBB xonanda Mubinloloni o‘ldirishga chaqiriq sifatida baholanishi mumkin bo‘lgan videorolik muallifiga nisbatan tekshiruv boshladi. Bu haqda poytaxt ichki ishlar boshqarmasi ma’lum qildi.

6-noyabr kuni kechqurun Olmazor tumani IIO FMB tomonidan qariyb 600 ming obunachiga ega bo‘lgan «umr.sham» taxallusli blogerning shaxsi aniqlanib, vaziyat IIBB nazoratiga olingan. Idora tomonidan e’lon qilingan videoda bloger o‘z harakatlaridan pushaymonligini bildirgan.

«IIO xodimlari men yaratgan kontent, rolik bo‘yicha qonuniy chora ko‘rilishini tushuntirishdi. Men ushbu kontentim uchun barchadan uzr so‘rayman. Qilgan ishimdan pushaymonman», — deydi bloger.

«Qora qop» va zo‘ravonlik targ‘iboti

Bir necha kun ichida 1 milliondan ortiq marotaba ko‘rilgan ushbu videoda qahramon xonanda Mubinloloning klipini tomosha qilib, uning ijodi «yaxshilikka olib bormaydi va milliy ma’naviyatga ziddir» degan xulosaga keladi.

So‘ngra u xonandani o‘ldirib, jasadini qora qopga ko‘mishga ochiqdan-ochiq ishora qiluvchi harakatlarni amalga oshiradi.

Rolik davomida qahramon jamiyatda o‘zligi va sha’nini unutgan odamlar ko‘payib ketganini ta’kidlab, unga yanada ko‘proq qora qop keltirishlarini so‘raydi. Qasos olish sahnalaridan so‘ng esa muallif O‘zbekiston va Ichki ishlar vazirligi bayroqlarini ko‘tarib chiqadi.

Nemolchi.Uz loyihasi 4-noyabr kuni huquq-tartibot organlarini videorolik mazmuniga va uning muallifi xatti-harakatlariga huquqiy baho berishga chaqirgan.

Loyiha vakillari bunday kontent zo‘ravonlik va o‘zboshimchalik bilan jazolash g‘oyalarini targ‘ib qilishi, jamoat xavfsizligi hamda qonun ustuvorligiga tahdid tug‘dirishini ta’kidlagan.

«Hech kim mustaqil ravishda kim yashashga loyiq va kim loyiq emasligini hal qilish huquqiga ega emas», — deyiladi loyihaning 6-noyabrdagi bayonotida.

Nemolchi.Uz, shuningdek, rolik e’lon qilinganidan keyin bir necha kun davomida muallifning xatti-harakatlariga huquqiy baho berilgani haqida rasmiy axborot bo‘lmaganini tanqid qilgan. Loyiha oddiy fuqarolar ijtimoiy tarmoqlardagi fikrlari uchun javobgarlikka tortilayotgan bir paytda, zo‘ravonlik sahnalari aks etgan video muallifiga nisbatan munosabat nega kechikayotganini so‘ragan.

Hozirda mazkur holat yuzasidan tergovga qadar tekshiruv o‘tkazilmoqda. IIBB fuqarolarni internetda axborot tarqatishda mas’uliyatli bo‘lishga va qonunlarga rioya qilishga chaqirib, tekshiruv yakunlariga ko‘ra albatta qonuniy qaror qabul qilinishini bildirgan.