Зеленский Путин кимдан қўрқишини айтди

Россия президенти Владимир Путин жанг майдонида ғалаба қозона олмаяпти ва бунинг ўрнини тўлдириш учун ўз жамиятига ниманидир кўрсатишга мажбур. Бу ҳақда Украина президенти Володимир Зеленский 22 сентябр куни Ню-Йоркда БМТ Бош Ассамблеяси доирасида АҚШ президенти билан учрашувдан сўнг маълум қилди.

«Урушни тугатиш ҳақида гапирганда тарихий сабабларни муҳокама қилиш, тўғрисини айтганда, мутлақо бемаъниликдир. Агар урушни тугатишни хоҳласангиз, уни бошламайсиз. Агар муаммони ҳал қилмоқчи бўлсангиз, уни ҳал қиласиз. Путин жанг майдонида ғалаба қозонмаяпти ва бу у учун муаммо, чунки у ўз жамиятига ниманидир кўрсатиши керак. Гап бизда, америкаликларда ёки украиналикларда эмас. У ҳеч кимни ҳурмат қилмайди. Унинг асосий масаласи — рус халқи. У фақат ўз халқидан қўрқади», — деди Зеленский.

Президентнинг таъкидлашича, ўзга давлат ҳудудидаги жанг майдонига миллионлаб аскар ташланган ва ҳар ой минглаб одамлар ҳалок бўлаётган бир пайтда, бирорта ҳам ғалабасиз буларнинг барчаси нима учун бўлаётганини тушунтириш имконсиз.

Музокараларга тайёргарлик ва халқаро босим

Украина етакчиси Путин билан «исталган вақтда» учрашишга тайёр эканлигини билдирди.

«Куласизми, кулмайсизми, бир-бирингизни ёмон кўрасизми, душманмисиз — буларнинг барчаси тушунарли. Урушни тугатишни хоҳлайсизми? Ўтиринг, гаплашинг. Ўйлайманки, Путин уч томонлама учрашувга, урушни тугатишга тайёр эмас», — дейди у.

Президент шунингдек, Кремлнинг ҳақиқий музокараларга тайёр эканлигига ишончи комил эмаслигини, шунинг учун Москвага босим ўтказиш мақсадида АҚШ, Европа ва Хитойнинг иштироки зарурлигини айтди.

Қайд этилишича, Украина Қуролли Кучлари Россиянинг нефтни қайта ишлаш қувватларининг 45 фоизини йўқ қилган.

Хитойнинг прагматизми ва Россиянинг кучга муносабати

Президентнинг сўзларига кўра, Хитой Россия билан ўз технологияларини дўстлик ёки биродарлик учун эмас, балки тўлиқ прагматик мақсадларда баҳам кўрмоқда. Бунга сабаб — Хитой келажакда қаердадир айнан мана шу тажрибадан фойдаланишни кўзлаганидир.

«Биз кучли бўлишимиз ва Путинга у бу сайёрада ёлғиз эмаслигини кўрсатишимиз керак, ҳатто бу унинг орзуси бўлса ҳам. Ва айнан шунинг учун у одамларни ҳурмат қилиши керак. Афсуски, руслар фақатгина кучли эканингизни кўрсатганингиздагина ҳурмат қилиши мумкин. Улар заифликни ҳурмат қилмайди», — деди президент.