Aliyev Rossiyani Ukrainada Ozarbayjon elchixonasiga qasddan zarba berganlikda aybladi

Ozarbayjon prezidenti Ilhom Aliyev Rossiya Ukraina hududida uning mamlakatiga tegishli diplomatik obektlarga zarbalar berganini ma’lum qildi. Bu haqda u kecha, 14-fevral kuni Myunxenda Ukraina prezidenti Vladimir Zelenskiy bilan uchrashuvdan so‘ng aytdi.

Aliyevning so‘zlariga ko‘ra, Ozarbayjonning Ukrainadagi elchixonasi uch marta hujumga uchragan.

«Ukrainadagi elchixonamizga uch marta zarba berildi. Birinchisidan keyin bu tasodif bo‘lishi mumkin, deb o‘yladik. Shundan so‘ng Rossiya tomoniga diplomatik vakolatxonalarimiz – konsullik bo‘limi, madaniy markaz va elchixona koordinatalarini yetkazdik. Shunga qaramay, yana ikki marta zarba berildi. Bu Ozarbayjonning diplomatik vakolatxonalariga qaratilgan qasddan qilingan hujumdir», – dedi Aliyev.

U Baku Moskvaga rasmiy nota yuborganini va Rossiya elchisi Tashqi ishlar vazirligiga chaqirilganini qo‘shimcha qildi. Ozarbayjon yetakchisi Rossiya harakatlarini «do‘stona bo‘lmagan qadam» deb atadi.

Rossiyaning javobi

Rossiya TIV esa javob tariqasida ayblovlardan «hayratda» ekanini bildirdi. Bayonotda zarbalarni rejalashtirishda «fuqarolarga zarar yetmasligi uchun jang qo‘llanilishi ma’lumotlari sinchiklab tekshirilishi», shuningdek, diplomatik missiyalar joylashuvi inobatga olinishi ta’kidlandi.

Baku-Moskva nizosi

Aliyevning bayonotlari Moskva va Baku o‘rtasidagi uzoq davom etayotgan inqiroz fonida yangradi. Bu inqiroz 2024 yil dekabr oyida AZAL samolyoti halokatidan keyin keskinlashgan edi. Samolyot Chechenistonda Rossiya havo mudofaa tizimi tomonidan urib tushirilgan. Aliyevni, jamoat oldida, Rossiya prezidenti Vladimir Putin fojiadan so‘ng darhol qo‘ng‘iroq qilmagani va shaxsan uzr so‘ramagani ranjitgan. Buning o‘rniga Ozarbayjon yetakchisi bilan Checheniston rahbari Ramzan Qodirov bog‘langani Bakuda ochiqdan-ochiq pisand qilmaslik sifatida qabul qilingan. Keyinchalik Kreml rasmiy uzr so‘rashga majbur bo‘ldi.

2025 yil kuzida keskinlik yanada oshdi: Rossiya kuch tuzilmalari Yekaterinburgda Ozarbayjondan chiqqan shaxslarga qarshi reyd o‘tkazdi. Amaliyot davomida 50 nafardan ortiq kishi ushlandi, ikki nafar – Ziyoddin va Husayn Safarovlar halok bo‘ldi. Baku Moskvani «suddan tashqari qotilliklar»da ayblab, o‘z fuqarolariga nisbatan qiynoq va qotillik bo‘yicha jinoiy ish qo‘zg‘atdi.

Shundan so‘ng Ozarbayjonda «Sputnik Ozarbayjon» rahbarlari – ijroiya direktori Igor Kartavix va bosh muharrir Yevgeniy Belousov ushlandi. Ularga firibgarlik va noqonuniy tadbirkorlik ayblovlari qo‘yildi. Keyinchalik ular Rossiyaga yuborildi.

Shu fon ortida Bakuda, shuningdek, Ozarbayjon prezidenti ma’muriyatining sobiq rahbari Ramiz Mextiyev ishi ham muhokama qilindi. Ozarbayjon OAV uni mamlakatdagi rossiyaparast kuchlar ramzi sifatida atagan. Rasmiylar uning hibsga olinganini rasman tasdiqlamagan bo‘lsa-da, bu voqea atrofida elitalar ichidagi kurashga doir turli taxminlar paydo bo‘ldi.