Немислар шикоят қилишди: «BOSS» брендини сохталаштирган тадбиркорга чора кўрилди
Тадбиркор бренд номидан ноқонуний фойдаланаётгани борасида Германиянинг «Hugo Boss AG» компанияси мурожаат қилган ва аниқланган 57 та контрафакт маҳсулот йўқ қилинади.
Ўзбекистон Адлия вазирлиги томонидан «Boss» брендини рухсатсиз ишлатиш билан боғлиқ ҳолат юзасидан ҳуқуқий чора кўрилди. Расмий маълумотларга кўра, O.A. исмли якка тартибдаги тадбиркор «Hugo Boss AG» (Германия) компаниясига тегишли товар белгисидан фойдаланиб, контрафакт маҳсулотларни ишлаб чиқарган ва сотувга таклиф этган.
Мурожаатни кўриб чиққан Адлия вазирлиги тегишли ҳуқуқбузарлик аниқланганидан сўнг, мазкур тадбиркорга нисбатан таъсир чораларини қўллади. Жумладан, реализация учун сақланаётган 57 дона сохта маҳсулотни йўқ қилиш бўйича мажбурият юкланди.
Эслатиб ўтамиз, 2025 йил 10 ноябрдан кучга кирган қонун ўзгаришларига кўра, бошқаларнинг товар белгисини ноқонуний ишлатиш катта миқдорда зарар етказилган тақдирда жиноий жавобгарликка сабаб бўлиши мумкин.
Адлия органлари интеллектуал мулк ҳуқуқларини ҳимоя қилиш, тадбиркорликда қонунийликни таъминлаш ва ҳуқуқий онгни ошириш бўйича ишларни изчил олиб бормоқда.
Вазирлик барча тадбиркорларни ўз брендини белгиланган тартибда рўйхатдан ўтказишга ҳамда агар брендидан рухсатсиз фойдаланиш ҳолатига дуч келинса, «1008» ишонч телефони орқали мурожаат қилишга чақирмоқда.
