O‘zbekistonda 4 ming kilometr yo‘l avtobanga aylantiriladi
Yangi dastur tranzit salohiyatini oshirish va transport xarajatlarini keskin kamaytirishni maqsad qilgan.
O‘zbekistonda uzunligi 4 ming kilometr bo‘lgan magistral yo‘llar xalqaro standartlarga javob beradigan zamonaviy avtobanlarga aylantiriladi. Bu vazifa 16-fevralda tasdiqlangan 2026 yilga mo‘ljallangan islohotlar dasturida belgilab qo‘yildi.
Loyihaga muvofiq, Andijon–Qo‘ng‘irot, Toshkent–Termiz, Samarqand–Shahrisabz va Olot–Sariosiyo yo‘nalishlaridagi asosiy transport yo‘laklari bosqichma-bosqich rekonstruksiya qilinadi. Moliyalashtirish davlat budjeti hamda xalqaro moliya institutlari mablag‘lari hisobidan amalga oshiriladi.
Avtoban — yuqori tezlikka mo‘ljallangan, mashinalar uzluksiz harakatlanishi uchun qurilgan maxsus keng magistral yo‘l.
Iqtisodiy samara
2026 yil mart oyida 2026–2030 yillarda umumiy foydalanishdagi avtomobil yo‘llarini qurish va rekonstruksiya qilish dasturi ishlab chiqiladi. Ushbu dastur asosida magistrallarni xalqaro talablarga moslashtirish uchun loyiha hujjatlari tayyorlanadi va belgilangan maqsadli ko‘rsatkichlarga erishish ta’minlanadi.
Qoraqalpog‘iston, Buxoro, Qashqadaryo va Surxondaryo hududlaridan o‘tuvchi yo‘llar ham yangilanadi. Xususan, 220 kilometr xalqaro va davlat ahamiyatidagi, shuningdek 80 kilometr mahalliy ahamiyatdagi avtomobil yo‘llari rekonstruksiya qilinishi rejalashtirilgan.
Tranzit salohiyati
Yangilangan avtobanlar orqali yo‘llarning kunlik o‘tkazish qobiliyati ortadi. Yuk ko‘tarish darajasi 13 tonnagacha oshishi, harakat vaqti 6 soatga qisqarishi va ekspluatatsiya xarajatlari ikki baravar kamayishi kutilmoqda.
Xalqaro transport yo‘laklarining rivojlanishi respublika tranzit salohiyatini kuchaytiradi va logistika xarajatlarini pasaytiradi. BMT tahlillariga ko‘ra, sifatli yo‘l infratuzilmasi iqtisodiyot o‘sishiga kamida 2 foiz qo‘shimcha sur’at beradi.
Loyiha ijrosi uchun Vazirlar Mahkamasi va Transport vazirligi mas’ul etib belgilangan. Prezident Shavkat Mirziyoyev mazkur tashabbusni avvalgi murojaatnomasida strategik ustuvor vazifa sifatida belgilagan edi.
