Иш жойида ҳалок бўлган 156 киши, Сирожиддин Одиловга сўралаётган 6 йиллик қамоқ ва семизлик бўйича МДҲда етакчи бўлган Ўзбекистон — 11 август дайжести

Ўзбекистондан кибержиноятга алоқадор 18,8 мингта банк картаси блокланди

2026 йилнинг биринчи ярмида Ўзбекистонда 9 282 та кибержиноят фош этилди. Кўрилган чоралар натижасида 13 мингдан ортиқ фуқарога етказилган 120,5 млрд сўмдан зиёд зарар қайтарилди. Шунингдек, 29 трлн сўмнинг ноқонуний равишда четга чиқиб кетишининг олди олинди ва жиноятларга алоқадор 18 838 та банк картаси блокланди.

Киберхавфсизлик бўйича профилактика тадбирлари орқали қарийб 23 млн аҳоли қамраб олинган. Ички ишлар вазирлиги маълумотларига кўра, кибержиноятларга қарши курашишда профилактика, молиявий операцияларни назорат қилиш ва аҳолининг рақамли саводхонлигини оширишга алоҳида эътибор қаратилмоқда.

Прокурор «Сирожиддин Медиа»га 6 йил қамоқ жазоси сўради

11 август куни Жиззах шаҳар жиноят ишлари бўйича судида блогер Сирожиддин Одиловга оид иш бўйича музокаралар давом этди. Давлат айбловчиси уни такроран содир этилган товламачилик ва хизмат мавқеидан фойдаланган ҳолда такроран содир этилган фирибгарликда айбдор деб топиб, 6 йиллик қамоқ ҳамда 20 БҲМ миқдорида жарима тайинлашни сўради.

Одилов айбловларни рад этган. Унга нисбатан жиноят иши 2026 йил март ойида қўзғатилган, иш судга етиб келгач, айбловлар товламачилик ва фирибгарлик моддалари билан кўриб чиқилмоқда. Судда якуний қарор ҳали қабул қилинмаган.

Ўзбекистонда 18 ёшдан катта аҳолининг қарийб учдан икки қисми ортиқча вазн билан яшамоқда

Ўзбекистонда 18 ёшдан катта аҳолининг 64 фоизи ортиқча вазн ёки семизлик билан яшамоқда. «Our World in Data» маълумотларига кўра, бу кўрсаткич 1980 йилда 28 фоиз атрофида бўлган. Натижа МДҲ давлатлари орасида энг юқори бўлиб, Озарбайжонда 63, Молдовада 61, Россияда 56 фоизни ташкил этган.

18–64 ёшдаги аҳолининг қарийб 20 фоизида семизлик қайд этилган. Муаммонинг асосий омиллари қаторида нотўғри овқатланиш ҳам бор: Ўзбекистонда бир киши кунига ўртача 14,9 грамм туз истеъмол қилади, бу ЖССТ тавсиясидан қарийб уч баравар кўп. Аҳолининг учдан бир қисми етарли мева-сабзавот истеъмол қилмайди, 46 фоизида эса холестерин миқдори юқори.

7 ойда иш жойларида 156 киши ҳалок бўлди

Январь–июль ойларида Ўзбекистонда иш жойларида 529 та бахтсиз ҳодиса қайд этилди. Улар оқибатида 580 киши жабрланган бўлиб, 156 нафари ҳалок бўлган, 402 киши оғир, 22 киши енгил жароҳат олган. Ҳодисаларнинг 372 таси оғир оқибатли бўлган.

Бахтсиз ҳодисалар энг кўп саноат (168 та) ва қурилиш (159 та) соҳаларида қайд этилган. Ҳудудлар кесимида Тошкент шаҳри 95 та ҳолат билан биринчи ўринда, Тошкент вилоятида 58 та, Қашқадарёда 38 та, Бухоро вилоятида 34 та, Андижон ва Самарқандда 33 тадан ҳолат кузатилган. Инспекция маълумотларига кўра, жабрланганлар учун 11,4 млрд сўмдан зиёд компенсация ундириб берилган.

Хивадаги «Қовун сайли» фестивали Гиннес рекордлари китобига киритилди

7–9 август кунлари Хивада ўтказилган «Қовун сайли» фестивалига 186 минг нафар меҳмон ташриф буюрди. Фестиваль доирасида 9 август куни 259 киши бир вақтда 10 дан ортиқ қовун навини татиб кўриб, «Энг катта қовун дегустацияси» бўйича Гиннес рекордини ўрнатди.

Тадбир «Ичан қалъа» ва «Арда Хива» мажмуаларида бўлиб ўтиб, унда қовун навлари, маҳаллий маҳсулотлар ва қишлоқ хўжалиги ютуқлари намойиш этилди. Фестивальда маҳаллий ва хорижий сайёҳлар, санъаткорлар ҳамда фермерлар иштирок этди.