Endi banklardan pasportsiz 500 dollargacha naqd valuta olish mumkin

2026 yil 9-avgustdan boshlab O‘zbekistonda banklardan pasportsiz olish mumkin bo‘lgan naqd chet el valutasi limiti oshirildi. Yangi tartibga ko‘ra, endi 500 AQSH dollarigacha bo‘lgan naqd valutani shaxsni tasdiqlovchi hujjatni taqdim etmasdan olish mumkin.

Avval banklardan pasportsiz eng ko‘pi bilan 100 AQSH dollari miqdorida naqd chet el valutasini olish mumkin edi. Yangi qaror bilan ushbu limit besh baravarga oshirildi.

Ushbu tartibni nazarda tutuvchi qaror Adliya vazirligi tomonidan 2026 yil may oyida davlat ro‘yxatidan o‘tkazilgan edi.

Undan avval, mart oyida Markaziy bank hamda Bosh prokuratura huzuridagi Iqtisodiy jinoyatlarga qarshi kurashish departamenti qaror loyihasini jamoatchilik muhokamasiga qo‘ygandi.

Muhokama jarayonida mijozlarni identifikatsiya qilish tartiblarini takomillashtirish va moliyaviy operatsiyalar shaffofligini oshirishga qaratilgan bir qator takliflar ham ilgari surilgan.

Qarorga muvofiq, banklar mijozlarni biometrik pasport, ID karta yoki raqamli identifikatsiya vositalari orqali tekshirishi lozim. Shu bilan birga, pul o‘tkazmalari va boshqa moliyaviy operatsiyalarga oid ma’lumotlarni yanada batafsil qayd etish talablari ham kuchaytirilmoqda.

Eslatib o‘tamiz, avvalroq Markaziy bank murojaatlar bo‘yicha eng salbiy ko‘rsatkichga ega 10 ta bankni e’lon qilgandi.