Logo

Ўзбекистондаги илк исломий банк эгаси ўзгармоқда

Кеча 13:053 дақиқа

Илк исломий банк лицензиясини қўлга киритган «Openbank» акциядорлари ўзгармоқда. Ҳозирда банкка эгалик қилувчи «Future Open Technology Group» АЖ ўз акцияларини устави 5 млн сўмлик компанияга ўтказиш бўйича қарор чиқарди. Банкнинг янги эгаси ким?

Ўзбекистондаги илк исломий банк эгаси ўзгармоқда © Ijtimoiy tarmoqlar

5-ноябрда «Openbank»нинг эгаси бўлган «Future Open Technology Group» АЖ банкдаги улушини тўлиқ «Open Global» МЧЖга ўтказиш бўйича қарор чиқарди. Бу ҳақда Корпоратив ахборот ягона порталида маълум қилинди.

Қарорга кўра, компанияга тегишли «Openbank» АЖ акцияларининг ҳаммаси «Open Global» МЧЖнинг устав капиталига ҳисса сифатида киритилади.

Шундай қилиб, банк энди тўғридан-тўғри «Future Open Technology Group»га эмас, «Open Global»га тегишли бўлади. Ҳужжатда бунга «корпоратив тузилмани реструктуризация қилиш» сабаб қилиб кўрсатилган. Битимни расмийлаштириш компания директори вазифасини вақтинча бажарувчи Фаррух Сулаймоновга топширилди.

«Future Open Technology Group» акцияларининг 92,009 фоизига «Investment Development-Textile» МЧЖ эгалик қилади. Бу компаниянинг 95 фоиз улуши ва «Future Open Technology Group»нинг 7,991 фоизига эса Тошпулов Шерзод Абдуқодирович эгалик қилади. Яъни, «Openbank»нинг асосий акциядори Шерзод Тошпулов ҳисобланади.

«Future Open Technology Group»даги Тошпулов ва унинг компаниясининг акциялари қайта сотиб олинади ва бекор қилинади.

Натижада «Future Open Technology Group»нинг устав капитали 512 млрд сўмдан 20 млрд сўмгача камайтирилади.

«Openbank»нинг янги эгаси ким?

Очиқ маълумотларга кўра, «Open Global» МЧЖ 2024-йилнинг августида Тошкент шаҳри Юнусобод туманида рўйхатдан ўтган. Унинг устав капитали 5 млн сўмдан бироз кўпроқни ташкил қилади.

«Open Global» МЧЖнинг эгаси сифатида эса «Open Holding LLC-FZ» кўрсатилган. Бу компания БААдаги эркин иқтисодий зоналардан бирида рўйхатдан ўтган бўлиши мумкин. Сабаби, «LLC-FZ» қўшимчаси Дубайдаги «Meydan» эркин зонасига хос. Бу зонада компания эгалари ҳақидаги маълумотлар ошкор қилинмайди.

«Openbank» тарихи

«Openbank» дастлаб «Smartbank» номи билан фаолият юритган. «Smartbank» 2022-йилнинг декабрида Марказий банкдан лицензия олгач, ўз фаолиятини бошлаган эди. Банк ўша пайтда «Agrobank»нинг шўъбаси сифатида иш бошлаган.

«Smartbank» ташкил этилганидан икки йилдан кўпроқ вақт ўтиб, 2025-йилнинг февралида банк акцияларининг 90,2 фоизи «Future Open Technology Group» АЖга 451 млрд сўмга сотилгани маълум бўлди.

Банкнинг янги эгаси «Open» экотизими билан боғлиқ бўлгани сабабли 2025-йилнинг сентябрида банк номи «Openbank» деб ўзгартирилди. 2026-йил июнда эса компания банкнинг 100 фоиз улушини ўзига расмийлаштирган эди.

2026-йил 23-октябрда Марказий банк «Openbank»га Ўзбекистонда исломий банк фаолияти учун илк лицензияни берди. Банкни бошқа тузилмага ўтказиш қарори шундан 13 кун ўтиб қабул қилинди.

Регулятор бунга рухсат берганми?

«Банклар ва банк фаолияти тўғрисида»ги қонуннинг 22-моддасига кўра, жисмоний ва юридик шахслар ёки биргаликда ҳаракат қилувчи шахслар, шу жумладан норезидентлар бир ёки бир неча битим натижасида банкнинг устав капиталидаги:

–        5 ва ундан кўпроқ фоизни, лекин кўпи билан 20 фоизни;

–        20 ва ундан кўпроқ фоизни, лекин кўпи билан 50 фоизни;

–        50 ва ундан кўпроқ фоизни ташкил этадиган улушни бевосита ёки билвосита олишдан олдин Марказий банкнинг дастлабки рухсатномасини олиши шарт.

Марказий банк илк исломий банкнинг янги эгалари бўйича рухсатнома берганми, БААда рўйхатдан ўтган компаниянинг бенефициари ҳақида маълумотга эгами каби саволлар очиқ қолмоқда. Шу сабабли Vaqt.uz нашри мазкур масала юзасидан Марказий банкка сўров юборди.

Эслатиб ўтамиз, аввалроқ «Openbank» бизнесни исломий молиялаштириш учун 10 млн долларгача маблағ жалб қилмоқчи экани хабар қилинган эди.

Теглар

Мавзуга оид