Акаевнинг кутилмаган ташрифи: собиқ президент Жапаровнинг муддатини узайтиришни таклиф қилмоқда

Қирғизистоннинг биринчи президенти Асқар Акаев амалдаги давлат раҳбари Садир Жапаровга «қирғиз иқтисодий мўъжизаси» режасини амалга ошириш учун яна бир президентлик муддатини бериш таклифи билан чиқди. Бу ҳақда Kaktus.media нашри маълум қилди.

Акаевнинг фикрича, мамлакат иқтисодиёти ҳозирда юксалиш босқичида бўлиб, ижтимоий соҳада ҳам ижобий тенденциялар кузатилмоқда. Бироқ белгиланган иқтисодий режаларни тўлиқ бажариш учун камида 8-10 йил вақт талаб этилади. Шу сабабли собиқ президент Қирғизистон халқи амалдаги давлат раҳбарига қўшимча мандат бериб, донолик билан иш тутишига умид билдирган.

Узоқ вақтдан сўнг илк бор мамлакатга келган Асқар Акаев Иссиқкўл халқаро форумининг юбилейида иштирок этмоқда. Диққатга сазовор жиҳати, ушбу тадбирнинг аввал эълон қилинган расмий иштирокчилари рўйхатида унинг исми мавжуд бўлмаган.

Акаевнинг аввалги ташрифлари

Асқар Акаев 2005 йил 24 мартдаги инқилоб пайтида Қирғизистонни тарк этган ва ўша йилнинг 3 апрелида расман истеъфога чиққан эди. Ушбу воқеалардан кейин бу унинг ватанга биринчи ташрифи эмас.

Бундан аввал, 2021 йилда собиқ президент «Қумтор» олтин кони иши бўйича кўрсатма бериш учун Қирғизистонга келган. Ўшанда Акаев халққа мурожаат қилиб, олтин кони лойиҳасини амалга оширишда йўл қўйилган хатолар учун қирғизистонликлардан узр сўраган эди.