Qozog‘iston prezidenti Shavkat Mirziyoyevga xat yozdi
To‘qayev maktubda Qozog‘iston delegatsiyasiga ko‘rsatilgan iliq mehmondo‘stlik uchun o‘z minnatdorligini bildirgan.
Qozog‘iston prezidenti Qosim-Jomart To‘qayev O‘zbekiston prezidenti Shavkat Mirziyoyevga minnatdorlik xati yo‘lladi. Bu haqda Akorda matbuot xizmati xabar berdi.
Qayd etilishicha, maktubda To‘qayev joriy yilning 14-16-noyabr kunlari O‘zbekistonga amalga oshirgan davlat tashrifi davomida Qozog‘iston delegatsiyasiga ko‘rsatilgan iliq mehmondo‘stlik uchun o‘z minnatdorligini bildirgan.
Xatda mazkur tashrifning tarixiy ahamiyati qayd etilgan bo‘lib, u Qozog‘iston va O‘zbekiston o‘rtasidagi strategik sheriklik va ittifoqdoshlikni mustahkamlashga kuchli turtki bergani ta’kidlangan.
Qozog‘iston prezidenti Toshkentda o‘tkazilgan Markaziy Osiyo davlatlari rahbarlarining VII Maslahat uchrashuvi tashkil etilishini ham yuqori baholagan. Uning so‘zlariga ko‘ra, mintaqa hamkorligining barcha yo‘nalishlari bo‘yicha mazmunli muhokamalar, qabul qilingan muhim qarorlar va hujjatlar, shuningdek, Ozarboyjonning to‘lahuquqli ishtirokchi sifatida qo‘shilishi forumga strategik ahamiyatga ega voqea maqomini bergan.
