Madaniyat va san’at vakillariga ipoteka subsidiyasi beriladi
Kamida uch yillik ish stajiga ega madaniyat, san’at va adabiyot sohasi vakillari davlat ko‘magida birlamchi uy-joy bozoridan kvartira sotib olishi mumkin.
© Ijtimoiy tarmoqlarO‘zbekistonda madaniyat, san’at va adabiyot sohasi vakillariga birlamchi uy-joy bozoridan kvartira sotib olish uchun ipoteka subsidiyasi beriladi. Ushbu tartib hukumatning 11-noyabrdagi 618-sonli qarori bilan tasdiqlandi.
Subsidiyani olish shartlari va talablari
Mazkur moliyaviy ko‘mak Iqtisodiyot va moliya vazirligi tomonidan qayta moliyalashtiriladigan ipoteka kreditlari doirasida taqdim etiladi. Belgilangan tartibga ko‘ra, talabgorlar ajratilgan subsidiyani faqat o‘zlarining asosiy ish joyi joylashgan hududda qurilgan yangi uylardan (birlamchi bozor) kvartira xarid qilishga yo‘naltirishlari mumkin.
Subsidiya olish uchun murojaatlar Davlat xizmatlari markazlari yoki Yagona interaktiv davlat xizmatlari portali (my.gov.uz) orqali qabul qilinadi. Ariza beruvchining talablarga muvofiqligi axborot tizimlari orqali avtomatik tarzda baholanadi.
Tasdiqlangan mezonlarga ko‘ra, nomzod quyidagi talablarga javob berishi lozim:
Madaniyat, san’at va adabiyot sohasida kamida uch yillik ish stajiga ega bo‘lishi;
Tegishli faoliyat bilan shug‘ullanish uchun so‘nggi uch yilda litsenziyaga ega bo‘lganligi (agar talab etilsa);
Arizachi va uning turmush o‘rtog‘i so‘nggi ikki yil davomida respublikaning hech bir hududida mulk huquqi asosida turar joyga ega bo‘lmaganligi.
Shuningdek, tizim tomonidan oilaning birgalikdagi daromadi ham tahlil qilinadi.
Moliyaviy tartib va ajratish muddatlari
Qoidaga ko‘ra, ipoteka subsidiyasi bir oilaga faqat bir marotaba ajratiladi. Subsidiya ajratilgani haqida ijobiy xabarnoma olgan fuqaro kvartira sotib olish uchun qurilish tashkiloti yoki developer bilan shartnoma tuzishi lozim bo‘ladi.
Agar boshlang‘ich badalning bir qismini qoplash uchun o‘tkazib berilgan mablag‘dan 30 kun ichida foydalanilmasa, xizmat ko‘rsatuvchi bank ushbu mablag‘ni respublika budjetiga qaytarishi belgilangan.
Eslatib o‘tamiz, 2026-yilning iyun oyida prezidentning madaniyat va san’at sohasi vakillari bilan o‘tkazilgan uchrashuvida soha vakillari, jumladan, muzey xodimlari va rassomlarga uy-joy olish uchun ipoteka krediti dastlabki to‘lovining yarmi davlat tomonidan qoplab berilishi ma’lum qilingan edi.
