Yevropa Gruziya oldida eshiklarini yopdi

Gruziya Yevropa Ittifoqiga a’zo bo‘lishga faqat rasman nomzod hisoblanadi. Buni Yevropa Ittifoqining kengayish masalalari bo‘yicha komissari Marta Kos 4 noyabr kuni Yevroparlamentda YeI kengayishi bo‘yicha hisobotni taqdim etayotib aytdi. Shu bilan Yevropa komissiyasi Gruziyaning Yevropa integratsiyasi muvaffaqiyatsizlikka uchraganini amalda tan oldi.

«Gruziyada vaziyat keskin yomonlashdi, demokratiya jiddiy orqaga ketmoqda... Komissiya Gruziyani faqat so‘zdagina nomzod davlat deb hisoblamoqda», - dedi Kos yevrodeputatlarga.

Yevrokomissiyaning tahliliy hujjatida ta’kidlanishicha, Gruziya rahbariyatining harakatlari mamlakatning Yevropa yo‘lini xavf ostiga qo‘ymoqda va a’zolikka qo‘shilish jarayonini amalda to‘xtatib qo‘ydi. Hujjatda qayd etilishicha, Gruziyada demokratiya jiddiy tanazzulga uchradi, qonun ustuvorligi tezda yemirilmoqda, aholining asosiy huquqlari esa qattiq cheklanmoqda.

Yevrokomissiya Gruziya hukumatini tizimli repressiyalarda, jumladan, fuqarolik makonini toraytiruvchi qonunlar qabul qilishda, mustaqil ommaviy axborot vositalari faoliyatini cheklashda, LGBT hamjamiyatini ta’qib qilishda va huquq-tartibot idoralari tomonidan haddan tashqari kuch ishlatishda aybladi.

«Hukumat yo‘nalishni o‘zgartirish va mamlakatni Yevropa yo‘liga qaytarish uchun hech qanday chora ko‘rmadi. Yetakchi muxolifatchilarning qamoqqa olinishi, shuningdek, hukmron partiyaning ayrim muxolifat partiyalari va ularga aloqador shaxslarni taqiqlash niyatini e’lon qilishi demokratik plyuralizmga to‘g‘ridan-to‘g‘ri hujum hisoblanadi», - deyiladi hujjatda.

Shu bilan birga, Gruziya tashqi ishlar vaziri Maka Bochorishvilining fikricha, Bryusselning Gruziyaga bergan baholari so‘nggi paytlarda bir tomonlama xarakterga ega. Shu munosabat bilan Tbilisida Yevrokomissiya hisoboti mamlakat erishgan taraqqiyotni to‘liq aks ettirmaydi, deb hisoblashmoqda.

2024 yil dekabr oyida Gruziya hukumati o‘zi mamlakatning Yevropa Ittifoqiga qo‘shilish jarayonini 2028 yilgacha to‘xtatgan edi.

«O‘shandan beri vaziyat sezilarli darajada yomonlashdi», - deya ta’kidladi Yevrokomissiya.

Gruziyaning muvaffaqiyatsizligi fonida Yevropa komissari to‘rtta islohot yetakchisi mamlakatni ajratib ko‘rsatdi.

«Chernogoriya, Albaniya, Ukraina va Moldova alohida ajralib turadi. Ular o‘tgan yil davomida islohotlarda eng ko‘p oldinga siljishdi», - dedi Kos.

Yetakchi davlatlar a’zolik muzokaralarini yakunlash bo‘yicha aniq rejalarga ega.

«Nomzodlarimizning maqsadlari juda ulkan. Chernogoriya muzokaralarni 2026 yil oxirida, Albaniya - 2027 yil oxirida, Moldova va Ukraina - 2028 yilda yakunlamoqchi», - deya ta’kidladi Yevropa komissari.

Kosning so‘zlariga ko‘ra, ba’zi nomzod mamlakatlarning islohotlar sur’atini hisobga olgan holda, «Yevropa Ittifoqining yaqin yillarda muvaffaqiyatli kengayishi to‘la haqiqatga aylanishi mumkin».

«Kelgusi yil barcha nomzod davlatlar uchun, ayniqsa, muzokaralarni yakunlash bo‘yicha ulkan rejalarni taqdim etgan davlatlar uchun haqiqat lahzasi bo‘ladi», - deya qo‘shimcha qildi u.