Donald Trampning loyihasi 200 million dollarlik sarmoya jalb etmoqchi

Bundan maqsad Digital Asset Treasury (DAT) nomli raqamli g‘aznachilik kompaniyasini yaratish bo‘lib, uning asosiy funksiyasi TRUMP tokenlarini yig‘ishdan iborat. Bloomberg'ga ma’lumot bergan manbalarga ko‘ra, loyiha tashabbuskori prezident Donald Trampning uzoq yillardan beri tanishi Bill Zanker bo‘lib, sarmoya hajmi 1 milliard dollargacha yetishi mumkin. Biroq bitimning hali barcha bosqichlari yakunlanmagan va amalga oshmasligi ham mumkin. «Fight Fight Fight» vakillari va Oq uy matbuot xizmati hozircha bu mavzuda rasmiy izoh bermagan. TradingView ma’lumotlariga ko‘ra, hozirda TRUMP tokenining qiymati 7,57 dollar bo‘lib, yanvar oyida u 44 dollarga qadar ko‘tarilgan edi. Tokenlarning katta qismi, ya’ni 800 million donasi Tramp va unga aloqador strukturalar tomonidan bloklangan holda tashqariga chiqarilmagan. Hozirda bozor savdolarida faqat 35 foiz tokenlar erkin aylanmoqda, bu umumiy bozor qiymatini taxminan 1,5 milliard dollarga yaqin darajada ushlab turibdi. Bill Zanker ilgari Trump Wallet — TRUMP tokeni va boshqa aktivlarni saqlash uchun raqamli hamyon yaratish niyatida bo‘lgan, ammo loyiha yozda DeFi va kripto maydonida faol bo‘lgan World Liberty Financial (WLF) bilan kelishmovchilik sabab to‘xtagan.